Një aksident rrugor është regjistruar ditën e sotme në qytetin e Gjirokastrës, ku një këmbësore është përplasur nga një automjet. Ngjarja ka ndodhur në vendin e quajtur “Postblloku”, pranë lagjes “Punëtori”, gjatë lëvizjes së automjetit në aksin Zona Muzeale-Ura e Lumit.
E dëmtuara është shtetasja 77-vjeçare Violeta Selfo, e cila është transportuar menjëherë në Spitalin Rajonal të Gjirokastrës për të marrë kujdesin e nevojshëm mjekësor. Nga të dhënat zyrtare të autoriteteve policore, bëhet e ditur se drejtuesi i automjetit tip “Toyota” është shtetasi A. M., 29 vjeç, banues në Gjirokastër.
Drejtuesi i mjetit është shoqëruar në komisariat për kryerjen e veprimeve të mëtejshme procedurale. Grupi hetimor ndodhet në vendngjarje dhe po punon për dokumentimin e plotë të rrethanave dhe shkaqeve që çuan në këtë përplasje.
Përditësime
Policia konfirmoi se këmbësorja e aksidentuar në Gjirokastër është shtetësja 77-vjeçare Violeta Selfo.