Një aksident rrugor ka ndodhur ditën e sotme në afërsi të fshatit Vodicë në Poliçan, në vendin e njohur si Çesma e Thatë. Si pasojë, tre anëtarë të një familjeje kanë marrë lëndime trupore pasi automjeti me të cilin udhëtonin ka dalë nga rruga në një kthesë dhe ka përfunduar në kanalin kullues në anë të saj.
Të lënduarit janë identifikuar si Veiz Shermalli (60 vjeç), Rabushe Shermalli (78 vjeçe) dhe Liljana Shermalli (58 vjeçe), e cila drejtonte automjetin tip Toyota Yaris me targa AC 173 AI. Të tre personat janë banues në fshatin Vodicë.
Fillimisht, të plagosurit janë dërguar në Spitalin Rajonal të Beratit për të marrë mjekimin e nevojshëm. Për shkak të frakturave të pësuara, 78-vjeçarja Rabushe Shermalli është përcjellë për trajtim të mëtejshëm drejt Spitalit të Traumës në Tiranë.
Grupi hetimor i Sektorit të Qarkullimit Rrugor ndodhet në vendngjarje për të dokumentuar rrethanat e plota të aksidentit. Si shkak paraprak i mundshëm, nga burimet zyrtare raportohet se nxehtësia e lartë e asfaltit mund të ketë ndikuar në rrëshqitjen e automjetit gjatë marrjes së kthesës.