Një aksident rrugor u regjistrua pasditen e së mërkurës pranë Thumanës, në aksin e vjetër Fushë Krujë–Thumanë. Dy automjete u përplasën me njëra-tjetrën dhe më pas përfunduan jashtë rruge.
Si pasojë e përplasjes, humbi jetën drejtuesi i njërit prej mjeteve, Arben Jangozi. Tre persona mbetën të plagosur, ndër të cilët një fëmijë ndodhej në njërin automjet. Ende nuk ka detaje të plota mbi gjendjen shëndetësore të të plagosurve.
Autoritetet policore mbërritën në vendngjarje dhe po punojnë për zbardhjen e rrethanave të aksidentit. Hetimet janë nisur për të përcaktuar shkaqet e ngjarjes.