Një aksident rrugor është regjistruar mesditën e sotme në zonën e njohur si Kthesa e Kamzës, ku një autobus i linjës urbane Vorë-Tiranë është përfshirë në një përplasje. Mjeti po largohej nga stacioni në drejtim të kryeqytetit kur, sapo u mbyllën dyert, pasagjerët dëgjuan një zhurmë në anën e majtë të drejtuesit. Autobusi ka goditur bordurën përgjatë gjithë gjatësisë së tij dhe ka përfunduar mbi trotuar.
Autoritetet konfirmojnë se nga ky incident nuk ka pasur persona të lënduar, ndonëse pasagjerët, mes të cilëve kishte edhe të moshuar, përjetuan momente paniku dhe zbritën menjëherë nga mjeti. Në vendngjarje kanë mbërritur shërbimet e policisë rrugore dhe përfaqësues të linjës së transportit për të zbardhur rrethanat.
Si pjesë e procedurave hetimore, policia ka ndaluar një automjet tjetër për verifikim, pasi dyshohet se mund të ketë pasur rol në shkaktimin e këtij aksidenti. Puna për përcaktimin e shkaqeve të sakta të ngjarjes vijon nga grupi hetimor.