Një incident rrugor është regjistruar paraditen e sotme në zonën e Zvërnecit në Vlorë, në rrugën Sazani pranë Manastirit. Ngjarja ka ndodhur rreth orës 11:30, kur dy autobusë kanë tentuar të shkëmbeheshin në një segment të ngushtë rruge.
Sipas të dhënave, një prej tyre, me targa AB108RP dhe markë MAN, ka dalë pjesërisht nga karrexhata. Dy gomat e anës së djathtë janë nxjerrë jashtë rrugës, duke e lënë mjetin të bllokuar dhe duke penguar qarkullimin në atë zonë.
Autobusët transportonin nxënës në një udhëtim shkollor drejt Manastirit. Shkaku kryesor dyshohet të jetë ngushtësia e rrugës dhe vështirësia e manovrimit të mjeteve të mëdha.
Në vendngjarje janë angazhuar persona për të ndihmuar në zhbllokimin e mjetit dhe rikthimin e tij në karrexhatë. Shërbimet përkatëse po asistojnë për normalizimin e qarkullimit dhe shmangien e bllokimeve të tjera.
Fatmirësisht, nuk raportohet për persona të lënduar ose dëme materiale. Të gjithë nxënësit janë në gjendje të mirë shëndetësore.
Përditësime
- Shtyllat anësore mbajtën autobusin, duke shmangur një aksident më të rëndë.
- Autobusi mbeti i anuar për shkak të pozicionit të vështirë.
- Ngjarja shkaktoi frikë tek pasagjerët.
- Nxënësit kishin mbërritur në Zvërnec për vizitë.