Era e fortë që përfshiu Vlorën mbrëmjen e djeshme dhe gjatë natës shkaktoi dëme materiale në qytet. Rreth orës 04:00 të mëngjesit, në zonën e Pyllit të Sodës, një pishë e madhe u rrëzua nga erërat e fuqishme dhe bllokoi plotësisht aksin rrugor drejt fshatit Zvernec.
Si pasojë e bllokimit, një automjet që po qarkullonte në atë segment u përplas me pishën e rënë. Nga aksidenti nuk u regjistruan lëndime trupore, por vetëm dëme materiale në mjet.
Forcat e zjarrfikëses së Vlorës mbërritën shpejt në vendngjarje, kryen prerjen e pemës dhe e larguan nga rruga, duke normalizuar qarkullimin në aksin e bllokuar.