Mëngjesin e kësaj të mërkure, në zonën e njohur si "Jalë e Nartës" në lagjen "24 Maji" të Vlorës, një aksident automobilistik përfshiu një mjet tip "Fiat" dhe një "Volkswagen". Si pasojë e përplasjes, 5 shtetas të huaj me origjinë indiane dhe afgane, të cilët udhëtonin drejt vendit të punës, mbetën të lënduar dhe u dërguan për ndihmë mjekësore në Spitalin Rajonal të Vlorës. Policia ka nisur hetimet për të zbardhur dinamikën e kësaj ngjarjeje.
Ndërkohë, një tjetër aksident është regjistruar në rrugën "Damian Humariti", në zonën e quajtur "Tregu i Frutave". Sipas njoftimit të policisë, dy automjete me drejtues shtetasit D. D. (30 vjeç) dhe E. O. (51 vjeç) janë përplasur. Një prej 5 pasagjerëve që ndodheshin në automjetin e drejtuar nga D. D. është dërguar në spital për të marrë ndihmë mjekësore dhe më pas është larguar, ndërsa të dy drejtuesit janë shoqëruar në komisariat për veprime të mëtejshme.
Në qytetin e Lezhës, një aksident është regjistruar gjatë orëve të natës në superstradën Lezhë-Milot. Dy automjete u përplasën dhe si pasojë njëri prej tyre përfundoi i përmbysur në anë të rrugës. Nga ky incident mbetën të lënduar 2 persona, të cilët pas dërgimit në spital rezultuan jashtë rrezikut për jetën. Policia Rrugore dyshon se shkak i aksidentit mund të ketë qenë një parakalim i gabuar dhe shpejtësia tej normave të lejuara.