Një aksident me pasojë vdekjen u regjistrua mëngjesin e sotëm në bypass-in e Vlorës, në afërsi të zonës së Kaninës. Në këtë ngjarje u përfshinë tre automjete, përplasja e të cilave shkaktoi pasoja të rënda materiale dhe njerëzore.
Sipas informacioneve nga vendngjarja, një furgon dhe një veturë u përfshinë nga flakët si pasojë e impaktit, duke u shkrumbuar plotësisht. Një viktimë, e identifikuar si F.K., rreth 35-40 vjeç, humbi jetën pasi mbeti e bllokuar brenda një automjeti tip BMW, i cili pësoi deformime të mëdha nga goditja. Ndërkohë, tre persona të tjerë të plagosur u dërguan në spital për të marrë ndihmën e nevojshme mjekësore.
Forcat zjarrfikëse dhe shërbimet e Policisë ndërhynë menjëherë për të menaxhuar situatën dhe për të nxjerrë trupin e viktimës nga mjetet e dëmtuara përmes prerjes së llamarinave. Grupi hetimor po punon për zbardhjen e rrethanave dhe shkaqeve të këtij aksidenti.
Përditësime
Policia e Vlorës ka identifikuar viktimën e aksidentit fatal në aksin Vlorë-Orikum, në fshatin Radhimë, si shtetasi Flamur Kabello. Ndryshe nga raportimet e mëparshme, ngjarja nuk ka ndodhur në bypass-in e qytetit. Në përplasjen ku u përfshinë tre mjete (Benz, BMW dhe Seat), kanë mbetur të lënduar 5 pasagjerë me shtetësi egjiptiane. Hetimet paraprake sugjerojnë se shkaku i aksidentit ishte një parakalim i gabuar me shpejtësi të lartë. Drejtuesit e mjeteve, V.R. (32 vjeç) dhe A.M. (31 vjeç), janë shoqëruar në polici, ndërsa rezultatet e alkooltestit për ta kanë dalë negative (0.000 mg/l).