Lagjja Nuhaj në Komogllavë të Ferizajt është përfshirë nga zija pas humbjes tragjike të tre anëtarëve të së njëjtës familje në një aksident rrugor në Gjermani. Viktimat, të cilët ishin duke u kthyer për në shtetin gjerman, kanë ndërruar jetë në orët e para të ditës së enjte.
Sipas informacioneve të konfirmuara nga familja, bëhet fjalë për një vetaksident në të cilin kanë humbur jetën tre personat që ndodheshin në automjet: Tahir Aliu (61 vjeç), i biri i tij Gentian Aliu (34 vjeç) dhe Laurent Aliu (16 vjeç). Ata ishin nisur nga Kosova ditën e mërkurë, rreth orës 11:30, me destinacion Gjermaninë.
Ngjarja ka shkaktuar reagime të shumta dhe mesazhe ngushëllimi nga banorët e zonës. Përmes njoftimeve publike, bashkëfshatarët kanë shprehur solidaritetin me familjen Aliu, duke e përshkruar këtë humbje si një plagë të rëndë për të gjithë komunitetin dhe duke theksuar se këta individë do të kujtohen gjithmonë me respekt dhe mall.
Autoritetet gjermane kanë konfirmuar zyrtarisht vdekjen e tre personave si pasojë e aksidentit. Rrethanat e plota të ngjarjes mbeten ende objekt i hetimeve nga organet kompetente gjermane.