Tre qytetarë me prejardhje nga Komogllava e Ferizajt kanë humbur jetën në një aksident tragjik në Gjermani, teksa po ktheheshin drejt vendbanimit të tyre pas qëndrimit në Kosovë. Viktimat janë identifikuar si Tahir Aliu (61), djali i tij Gentian Aliu (34) dhe Laurenti Aliu (16).
Sipas raportimeve të medias gjermane Bayerischer Rundfunk, aksidenti ka ndodhur të enjten në mëngjes në autostradën A3, pranë Nittendorfit në rrethin e Regensburgut. Automjeti, për shkaqe ende të paqarta, ka dalë nga autostrada, ka rënë poshtë një argjinature dhe ka përfunduar mbi shinat hekurudhore që kalojnë nën autostradë, ku u ndal në buzë të binarëve.
Operacioni i shpëtimit ishte mjaft kompleks, pasi viktimat kishin mbetur të bllokuara në automjet, duke kërkuar ndërhyrjen e një vinçi për nxjerrjen e mjetit. Për shkak të përplasjes, u dëmtua linja ajrore e furnizimit me energji elektrike dhe binarët, çka çoi në bllokimin dhe evakuimin e një treni me rreth 80 pasagjerë. Udhëtarët e trenit u transferuan në një mjet tjetër hekurudhor, ndërsa treni i bllokuar u tërhoq më pas nga një lokomotivë me naftë.
Policia gjermane bëri të ditur se hetimet paraprake tregojnë se në aksident dyshohet të ketë qenë e përfshirë vetëm automjeti i viktimave. Me urdhër të Prokurorisë së Regensburgut, është angazhuar një ekspert për të rindërtuar rrethanat e ngjarjes. Autostrada Regensburg–Nuremberg dhe linja hekurudhore mbetën të mbyllura për disa orë gjatë kryerjes së hetimeve dhe pastrimit të vendngjarjes.
Përditësime
Qerim Rexhepi, bashkëvendës i viktimave nga lagjja Nuhaj e Komogllavës, ka bërë të ditur lidhjet familjare të tre qytetarëve që humbën jetën në aksidentin tragjik në Gjermani: Tahir Aliu (61) ishte vëllai i Remzi Aliut, Gentian Aliu (34) ishte i biri i Tahirit, ndërsa Laurenti Aliu (16) ishte djali i Bardhyl Aliut.
Autoritetet gjermane kanë bërë të ditur detaje të reja mbi aksidentin fatal të familjes nga Ferizaj. Viktimat ishin nisur nga Kosova më 5 gusht, rreth orës 23:30, me destinacion Gjermaninë. Automjeti, i cili po udhëtonte drejt Nurembergut, doli nga autostrada si pasojë e humbjes së kontrollit. Për shkak të përplasjes së fortë, tre personat humbën jetën në vendin e ngjarjes.
Ambasadori i Kosovës në Gjermani, Faruk Ajeti, konfirmoi se përfaqësia diplomatike është në kontakt të vazhdueshëm me autoritetet gjermane për ofrimin e ndihmës së nevojshme. Viktimat, të nisur nga Kosova më 5 gusht, pësuan aksidentin në mëngjesin e 6 gushtit. Operacioni i shpëtimit ishte mjaft kompleks, duke kërkuar përdorimin e mjeteve të rënda, përfshirë një vinç special, për nxjerrjen e automjetit nga shinat.
Ministri në detyrë i Punëve të Jashtme dhe Diasporës, Glauk Konjufca, i ka shprehur ngushëllime familjes Aliu nga Ferizaj, pas humbjes tragjike të tre anëtarëve të saj në një aksident në Gjermani. Ambasadori i Kosovës në Berlin, Faruk Ajeti, ka njoftuar se institucionet e Kosovës janë duke ofruar mbështetje të plotë për familjarët dhe po angazhohen në procedurat për kthimin e trupave në atdhe.
Familjarët bënë të ditur se kontakti i fundit me familjen Aliu u realizua rreth orës 06:15, pak minuta para aksidentit fatal. Pas njoftimit zyrtar nga policia gjermane, të afërmit po organizohen për të udhëtuar drejt Gjermanisë për procedurat e tërheqjes së trupave. Ndërkohë, autoritetet kanë saktësuar se viktima Tahir Aliu ishte 63 vjeç, dhe jo 61 siç u raportua fillimisht.
Është konfirmuar zyrtarisht identiteti i tre anëtarëve të familjes Aliu nga Ferizaj, të cilët humbën jetën në një aksident trafiku në Gjermani. Pas përfundimit të procesit të identifikimit, mediat kanë publikuar edhe fotografitë e viktimave.
Autoritetet gjermane bënë publik identifikimin zyrtar të viktimave të aksidentit tragjik në autostradën A3. Viktimat janë Tahir Aliu (61 vjeç), Gentian Aliu (34 vjeç) dhe Laurent Aliu (16 vjeç). Sipas informacioneve të siguruara, familja ishte duke u kthyer në Gjermani pas qëndrimit për pushime në Kosovë.