Dy motra me shtetësi zvicerane dhe origjinë nga fshati Topanicë i Kamenicës kanë ndërruar jetë si pasojë e një aksidenti fatal të ndodhur në autostradën A5 në Gjermani. Viktimat janë identifikuar si Erza Zubaku (24 vjeçe) dhe Aulona Zubaku (18 vjeçe).
Sipas autoriteteve policore gjermane, aksidenti ka ndodhur të shtunën pas orës 11:30. Ngjarja është pasuar nga dy incidente të njëpasnjëshme në të njëjtin segment rrugor. Aksidenti i parë ka ndodhur pranë zonës së pushimit Renchtal, ku dy automjete janë përplasur gjatë një manovre për ndërrim korsie, duke shkaktuar plagosjen e rëndë të një personi.
Kjo situatë çoi në një aksident të dytë zinxhiror pranë nyjës së Appenweierit, ku u përfshinë gjithsej 5 automjete. Dy motrat, të cilat udhëtonin me një automjet tip Smart, kanë humbur jetën në vendngjarje si pasojë e plagëve të marra. Sipas policisë, pasagjerët e katër automjeteve të tjera të përfshira në përplasje kanë shpëtuar pa lëndime.
Për shkak të operacioneve të shpëtimit dhe hetimeve, autostrada është mbyllur për disa orë. Dëmi material i shkaktuar vlerësohet të jetë mbi 100 mijë euro. Autoritetet e inspektoratit të policisë rrugore në Baden-Baden kanë nisur hetimet për të përcaktuar rrethanat e sakta të përplasjes.