Dy vajza nga Topanica e Kamenicës kanë humbur jetën në një aksident të rëndë automobilistik të ndodhur në Gjermani. Viktimat janë identifikuar si E. Zubaku, 24 vjeçe, dhe A. Zubaku, 18 vjeçe. Vdekja e tyre është konfirmuar nga familjarët e të ndjerave.
Sipas raportimeve të mediave gjermane dhe të dhënave paraprake të policisë, aksidenti ka ndodhur si pasojë e një manovre të pasuksesshme gjatë ndryshimit të korsisë. Fillimisht, dy automjete janë përplasur me shpejtësi të lartë. Kjo përplasje ka shkaktuar një aksident zinxhiror, ku janë përfshirë pesë automjete të tjera që nuk kanë arritur të frenonin në kohë.
Përveç dy viktimave, një person tjetër i përfshirë në ngjarje ka pësuar lëndime të rënda trupore. Policia lokale ka njoftuar se pasagjerët e katër automjeteve të tjera, të cilat u bënë pjesë e aksidentit zinxhiror, nuk kanë pësuar lëndime.
Përditësime
Autoritetet gjermane kanë identifikuar viktimat e aksidentit fatal si motrat Erza Zubaku dhe Aulona Zubaku. Sipas policisë, ngjarja ka ndodhur në autostradën A5, pranë Appenweier, ku automjeti i tyre i tipit Smart është përfshirë në përplasje.