Mesditën e sotme, në rrugën nacionale Levan-Tepelenë, në afërsi të fshatit Fratar, ka ndodhur një aksident zinxhir ku janë përplasur 5 automjete. Në mesin e mjeteve të përfshira raportohet të ketë qenë edhe një kamper me turistë.
Si pasojë e përplasjes kanë mbetur të lënduar 3 persona, një shtetas shqiptar dhe dy shtetas gjermanë. Të lënduarit u dërguan fillimisht për ndihmë mjekësore në Spitalin Rajonal të Fierit. Sipas informacioneve, dy prej të lënduarve janë transportuar drejt Tiranës për mjekim më të specializuar, ndërsa të gjithë personat e përfshirë ndodhen jashtë rrezikut për jetën.
Shërbimet e policisë dhe grupi hetimor kanë mbërritur në vendngjarje për të kryer veprimet procedurale. Të dhënat paraprake sugjerojnë se ngjarja mund të jetë shkaktuar nga lëvizja me shpejtësi tej normave të lejuara në këtë aks rrugor, i cili është mjaft i frekuentuar nga pushuesit gjatë kësaj periudhe.
Aksidenti shkaktoi paralizë të përkohshme të qarkullimit rrugor, duke krijuar radhë kilometrike. Policia vijon punën për normalizimin e trafikut dhe zbardhjen e plotë të rrethanave të ngjarjes.