Një aksident tragjik me pasojë vdekjen ka ndodhur mbrëmjen e së martës, më 4 gusht, në provincën e Pistoias në Itali. Viktima është Maksim Sinani, 33 vjeç, banor i Altopascios. Sipas informacioneve nga mediat italiane, Sinani po udhëtonte me motorin e tij të tipit Kawasaki Z1000 në drejtim të Pistoias, në shoqërinë e një grupi motoristësh, kur u përfshi në një përplasje të fortë ballë për ballë me një automjet Volkswagen Tiguan që vinte nga drejtimi i kundërt. Goditja ka qenë jashtëzakonisht e fuqishme, aq sa 33-vjeçari është hedhur rreth 50 metra larg vendit të përplasjes, ndërsa motori është shkatërruar plotësisht. Viktima ka pësuar dëmtime të shumta në trup dhe plagë të rënda në njërën këmbë. Shërbimet e emergjencës kanë mbërritur menjëherë në vendngjarje, ku kanë gjetur të riun ende të vetëdijshëm. Maksim Sinani është dërguar fillimisht në spitalin San Jacopo në Pistoia, ku u stabilizua dhe u intubua. Rreth orës 23:00, ai është transportuar me helikopter në Qendrën e Traumës në Careggi për trajtim të specializuar. Megjithatë, gjendja e tij është përkeqësuar gjatë natës dhe ai ka ndërruar jetë si pasojë e plagëve të marra. Autoritetet italiane kanë nisur hetimet për të zbardhur rrethanat e plota të këtij aksidenti.
Përditësime
Hetuesit kanë lokalizuar vendngjarjen e aksidentit fatal, që ndodhi rreth orës 19:30 të së martës në rrugën shtetërore SS64, pranë fshatit Spedaletto dhe liqenit Specchio.
Sipas raportimeve të medias italiane 'La Nazione', ekipet e shpëtimit angazhuan helikopterin e emergjencës 'Pegaso 2' për transportin e 33-vjeçarit Maksim Sinani drejt Qendrës së Traumës në Careggi.