Aksidenti ndodhi paraditen e së dielës, më 12 korrik, në zonën e Bezzecca, në Val di Ledro të provincës së Trentos. Renis Domi, 42 vjeç, banues prej vitesh në Concesio, po drejtonte motoçikletën e tij tip Yamaha R1 kur u përplas ballë për ballë me një automjet tip Renault Clio, të drejtuar nga një 67-vjeçare.
Sipas raportimeve, përplasja dyshohet se ndodhi në momentin kur automjeti po kryente një manovër kthimi. Goditja ka qenë mjaft e fuqishme, duke shkaktuar vdekjen e menjëhershme të 42-vjeçarit në vendngjarje.
Në momentin e aksidentit, partnerja e viktimës po udhëtonte rreth 100 metra pas tij me një tjetër motoçikletë, duke u bërë dëshmitare e drejtpërdrejtë e tragjedisë. Menjëherë në vendin e ngjarjes mbërritën shërbimet e emergjencës, të cilat konstatuan vdekjen e Renis Domit, ndërsa drejtuesja e automjetit, e cila pësoi lëndime të rënda, u dërgua për ndihmë mjekësore në spitalin e Trentos.
Policia Rrugore italiane ka nisur hetimet për zbardhjen e dinamikës së plotë të ngjarjes dhe përcaktimin e përgjegjësive ligjore.