Një aksident tragjik rrugor i ndodhur gjatë orëve të para të mëngjesit në Manzë të Durrësit ka shkaktuar humbjen e jetës së tre personave dhe plagosjen e dy të tjerëve. Viktimat e kësaj ngjarjeje janë identifikuar si Alvi Muhaxhiri, 15 vjeç, si dhe çifti i sapomartuar, Kleo Vrioni dhe partnerja e tij italiane, Sara Brugentelli (e identifikuar në disa burime edhe si Brugnatelli).
Në po të njëjtin aksident, të plagosur mbetën Rejsi Vrijoni, 25 vjeç dhe Klevis Dervishi, 16 vjeç. Ngjarja ka shkaktuar tronditje në komunitet, ndërsa shkolla ku ndiqte studimet 15-vjeçari Alvi Muhaxhiri ka reaguar me një dedikim prekës për ndarjen e tij të parakohshme nga jeta. Në reagimin e shkollës, të ndarë edhe nga mësuesi Leonik Tomeo, theksohet se ikja e nxënësit ka lënë një boshllëk të madh në bankat e shkollës dhe në zemrat e të gjithë mësuesve e shokëve të tij, duke shprehur ngushëllimet më të sinqerta për familjarët në këto momente të vështira.
"Me hidhërim të thellë e zemër të thyer mësuam lajmin për ndarjen e parakohshme nga jeta të nxënësit tonë të dashur Alvi Muhaxhiri. Ikja e tij kaq e shpejtë la një boshllëk të madh në bankat e shkollës sonë dhe në zemrat e të gjithë mësuesve e shokëve të tij. Në këto momente të vështira, i shprehim ngushëllimet më të sinqerta familjarëve. Zoti ju dhëntë forcë për të përballuar këtë dhimbje të papërshkrueshme. Kujtimi dhe buzëqeshja e tij do të mbeten përherë të gjalla në shkollën tonë. U prehtë në paqe shpirti yt Alvi!", thuhet në mesazhin zyrtar të shkollës.