Një aksident rrugor me pasoja tragjike është regjistruar në zonën Kadinhani, në provincën e Konias në Turqi. Ngjarja ndodhi pasditen e së enjtes, rreth orës 15:00, në autostradën Konia-Afion Karahisar. Një kamion, i cili ishte duke lëvizur në drejtim të Konias, ka dalë nga korsia e tij për të hyrë në korsinë e kundërt të qarkullimit, ku më pas është përplasur me katër automjete të tjera që ishin të ndalura në semafor.
Nga të dhënat paraprake të raportuara nga mediat turke, dyshohet se drejtuesi i kamionit ka humbur kontrollin e mjetit si pasojë e një defekti teknik në frena. Mjeti i rëndë ka kaluar fillimisht nga korsia e djathtë në atë të majtë, për të përfunduar më pas në korsinë përballë, ku goditi fuqishëm tri vetura dhe një kamion tjetër.
Si pasojë e kësaj përplasjeje, një 65-vjeçar, i cili drejtonte një prej automjeteve të përfshira në aksident, ka humbur jetën. Gjithashtu, 10 persona të tjerë kanë marrë plagë dhe lëndime të ndryshme. Të gjithë të lënduarit janë dërguar menjëherë në spitalet e zonës, ku po marrin ndihmën e nevojshme mjekësore. Momenti i përplasjes është regjistruar nga kamera e një automjeti që ndodhej në vendngjarje, duke dokumentuar dinamikën e aksidentit.