Një aksident rrugor ka ndodhur në afërsi të kryqëzimit të Plasës, në rrugën nacionale Korçë-Kapshticë. Kamioni me tonazh të rëndë, që udhëtonte nga Korça drejt Kapshticës, u përmbys për shkak të erës së fortë, pak kilometra pas fshatit Belorta.
Kamioni u përplas me një automjet që lëvizte në drejtim të kundërt, nga Kapshtica drejt Korçës. Sipas policisë, ngjarja rrezikoi drejtuesin e automjetit të vogël, por të dy drejtuesit e mjeteve nuk kanë marrë dëmtime të rënda dhe ndodhen jashtë rrezikut.
Përmbysja e kamionit bllokoi qarkullimin në të dy drejtimet e rrugës për më shumë se 40 minuta. Aktualisht, lëvizja e automjeteve është rikthyer në normalitet.