Një aksident i rëndë rrugor u regjistrua këtë të martë, rreth orës 16:20, në zonën e TEG-ut në Tiranë. Një kamion (pompë betoni) u përplas me një automjet, përplasje e cila bëri që mjeti i tonazhit të rëndë të çajë barrierat mbrojtëse metalike të rrethrrotullimit dhe të bjerë në nivelin e poshtëm të aksit rrugor Tiranë-Elbasan, në drejtim të Elbasanit.
Sipas njoftimit zyrtar të Policisë së Shtetit, nga ky aksident ka humbur jetën njëri prej personave që udhëtonte në kamion, ndërsa personi tjetër që ndodhej në të njëjtin mjet është dërguar në spital në gjendje të rëndë shëndetësore. Identiteti i dy personave që ndodheshin në mjetin e tonazhit të rëndë mbetet ende i paqartë dhe autoritetet po punojnë për të përcaktuar rolet e tyre përkatëse.
Në aksident është përfshirë edhe një automjet tip Audi, drejtuesi i të cilit, shtetasi Roland Nuri, 28 vjeç, ka marrë lëndime. Ai është transportuar për ndihmë mjekësore dhe ndodhet jashtë rrezikut për jetën.
Grupi hetimor ndodhet në vendngjarje për të kryer veprimet procedurale dhe për të zbardhur rrethanat e sakta të përplasjes. Për shkak të ngjarjes, në zonë është shënuar trafik i rënduar, ndërsa qarkullimi i mjeteve është devijuar përkohësisht.
Përditësime
Policia e Shtetit ka konfirmuar se dy shtetasit egjiptianë, të përfshirë në aksidentin tragjik te rrethrrotullimi i TEG-ut, kanë humbur jetën. Viktimat janë identifikuar si Mohamed Lotf, 30 vjeç (drejtues), dhe Mohamed Ali, 44 vjeç (pasagjer), të cilët ishin të punësuar në Shqipëri. Sipas hetimeve paraprake dhe pamjeve filmike, shkak i aksidentit ka qenë shkelja e përparësisë nga drejtuesi i betonieres, i cili po vinte nga Unaza Lindore.
Hetimet për aksidentin tragjik te rrethrrotullimi i TEG-ut konfirmuan vdekjen e dy shtetasve egjiptianë, Mohamed Lotf (30 vjeç) dhe Mohamed Ali (44 vjeç). Sipas Policisë së Shtetit, aksidenti ndodhi kur një betoniere hyri me shpejtësi në rrethrrotullim, goditi një mjet tip Audi, theu barrierat mbrojtëse dhe ra mbi një automjet në nivelin e poshtëm. Autoritetet po hetojnë tri pista: defektin teknik të mjetit të tonazhit të rëndë, gabimin njerëzor për shkak të mosnjohjes së sinjalistikës ose humbjen e ndërgjegjes së drejtuesit. Ekspertët po shqyrtojnë gjithashtu rregulloren e qarkullimit për mjetet e rënda në këtë zonë problematike gjatë orareve me fluks të lartë.