Aktivistët e Lëvizjes Vetëvendosje, Qendra në Prishtinë, zhvilluan sot një aksion simbolik para objektit të Komunës së Prishtinës, duke bllokuar hyrjen kryesore me thasë të mbushur me mbeturina. Ky veprim u ndërmor si formë proteste ndaj situatës së rënduar të pastërtisë në kryeqytet.
Asamblisti i Lëvizjes Vetëvendosje në Prishtinë, Egzon Azemi, e cilësoi gjendjen aktuale si alarmante, duke deklaruar se shumë lagje janë shndërruar në deponi. Sipas Azemit, kjo situatë është pasojë e keqmenaxhimit nga ana e kryetarit Përparim Rama, të cilin e akuzoi se i ka shërbyer agjendave të Partisë Demokratike të Kosovës në dëm të shërbimeve ndaj qytetarëve.
Ndër kritikat e tjera të adresuara nga Azemi ishte mosblerja e mjeteve për pastrimin e qytetit ndër vite dhe mënyra e funksionimit të ndërmarrjes “Pastrimi”. Ai pohoi se, ndonëse kjo ndërmarrje ka rreth 900 të punësuar, vetëm një numër i kufizuar prej mbi 100 personash janë të angazhuar drejtpërdrejt në pastrimin e qytetit, ndërsa të tjerët janë staf administrativ.
Aksioni zgjati për pak minuta, pasi ndërmarrja “Pastrimi” reagoi menjëherë duke larguar thasët nga hyrja e objektit. Në vendngjarje është parë gjithashtu prania e Inspektoratit për të mbikëqyrur situatën.