Komuna e Prishtinës ka nisur aksionin për largimin e mbeturinave vëllimore në mbi 72 lokacione të kryeqytetit. Drejtoria e Shërbimeve Publike ka vendosur pesë ekipe që do të veprojnë njëkohësisht në lagje të ndryshme.
Drejtori i Shërbimeve Publike, Leutrim Retkoceri, deklaroi se procedurat ligjore për lejen mjedisore komunale janë finalizuar dhe se qendra transitore do të shërbejë për grumbullimin e përkohshëm të mbeturinave para dërgimit në deponinë qendrore. Ai bëri të ditur se aksioni ka filluar nga lagjet qendrore urbane, përfshirë shkollën "Gjergj Fishta" dhe Parkun e Taukbahçes.
Banorët e lagjeve të prekura kanë shprehur shqetësim për praninë e mbeturinave prej disa javësh dhe kanë kërkuar ndërhyrje të shpejtë nga autoritetet komunale.
Retkoceri u bëri thirrje qytetarëve që të mbajnë qytetin të pastër dhe të drejtohen te komuna për ndihmë në trajtimin e mbeturinave vëllimore. Aksioni pritet të vazhdojë deri në largimin e plotë të mbeturinave nga të gjitha lokacionet e identifikuara.