Autoriteti Kombëtar për Sigurinë Kibernetike (AKSK) ka publikuar raportin për vitin 2025, ku evidenton 294 raste rrjedhje të dhënave nga infrastruktura kritike dhe të rëndësishme të informacionit. Këto raste prekin sektorë si shëndetësia, telekomunikacionet, energjia, arsimi, bankat dhe furnizimi me ujë të pijshëm.
Të dhënat e vjedhura mund të përdoren për akses të paautorizuar në sisteme, platforma apo shërbime digjitale. Eksperti i teknologjisë së informacionit Shahin Dokuzi shpjegon: "Marrim si shembull shëndetësinë. Databazat e këtij sektori gjenden në e-Albania. Nëse ndodh një sulm kibernetik, ashtu siç ndodhi, mjekët, qytetarët dhe institucioni nuk do të kenë ura lidhëse".
Pjesa më e madhe e sulmeve kibernetike ishin të tipit Phishing, Malware dhe DoS, ky i fundit i përdorur edhe nga hakerët iranianë kundër institucioneve shqiptare. Dokuzi shton: "Sigurisht që ka më shumë sulme. Problemi është se ende nuk po ka një frymë nga bizneset për t’u mbrojtur. Shpesh presin faktin e ndodhur e më pas reagojnë".
AKSK ka identifikuar sektorët me rrezikun më të lartë nga sulmet kibernetike:
- energjia;
- transporti;
- sektori bankar;
- furnizimi me ujë;
- infrastruktura shtetërore digjitale;
- shëndetësia.