Autoriteti Kombëtar për Sigurinë Kibernetike (AKSK) njoftoi se më 25 mars 2026 është konstatuar një incident kibernetik që ka prekur infrastrukturën e teknologjisë së informacionit të Postës Shqiptare.
Bazuar në vlerësimin paraprak, nuk janë identifikuar të dhëna të enkriptuara apo të fshira, si dhe nuk janë konstatuar ndërprerje të shërbimeve si pasojë direkte e këtij incidenti. AKSK ka ndërmarrë menjëherë hapat e procedurave operative, duke ngritur një grup pune me ekspertë të sigurisë kibernetike.
Ky grup po punon në bashkëpunim me stafin teknik të Postës Shqiptare për:
- analizimin e thelluar të incidentit dhe verifikimin e çdo komprometimi të mundshëm;
- identifikimin e indikatorëve të komprometimit (IOC);
- analizën e regjistrave dhe ngjarjeve në sistemet kritike;
- izolimin dhe sigurimin e sistemeve për të parandaluar ndikime të mëtejshme.
Si masë parandaluese, me rekomandim të AKSK-së, Posta Shqiptare ka vendosur përkohësisht jashtë funksioni disa shërbime për të mundësuar analizë të plotë. Aktualisht, të gjitha shërbimet publike janë rikthyer dhe funksionojnë normalisht.
Në burime të hapura janë publikuar disa të dhëna të dyshuara si të ekstraktua, të cilat po verifikohen për autenticitet dhe burim. Deri tani, sasia e të dhënave të mundshme të ekspozuara vlerësohet e kufizuar. Posta Shqiptare konfirmoi ekspozimin e disa të dhënave në sasi të pakët, pa ndërprerje shërbimi.
Disa media raportojnë se sulmin e ka marrë përsipër grupi iranian Homeland Justice, pas një sulmi të ngjashëm ndaj Kuvendit të Shqipërisë, ndërkohë që AKSK nuk e ka konfirmuar autorin. AKSK dënon aktet që cënojnë infrastrukturat kritike dhe premton informim transparent deri në raportin përfundimtar.