Aktori dhe regjisori Sacha Baron Cohen, 54 vjeç, është përballur me kritika të ashpra pas publikimit të trailerit të filmit të tij të ri, “Ali G: Who Iz I?”. Fushata e nisur nga platforma britanike NewsCord u bën thirrje kinemave në mbarë botën që të mos e shfaqin këtë prodhim, pasi sipas tyre, personazhi përdor satirën për të përforcuar stereotipe të dëmshme ndaj kulturës xhamajkane dhe njerëzve me ngjyrë.
Sipas aktivistëve, personazhi i Ali G-së promovon imazhe mizogjine dhe stereotipe të lidhura me përdorimin e kanabisit. Ata theksojnë se kritikat për këtë personazh kanë ekzistuar që në fillimet e tij, duke përmendur krahasimet e bëra nga shkrimtarja Jeanette Winterson dhe komedianë britanikë me ngjyrë. Grupi pretendon se janë dërguar rreth 41 mijë email-e nga mbështetësit e fushatës drejt rrjeteve të kinemave.
Nga ana tjetër, Phil Clapp, drejtuesi i UK Cinema Association, deklaroi për Variety se kinematë nuk janë institucione të censurës. Ai u shpreh se vendimi për shfaqjen e një filmi bazohet mbi certifikimin e marrë nga BBFC [British Board of Film Classification] dhe vlerësimin e audiencës përkatëse.
Filmi, i cili është xhiruar në fshehtësi gjatë një viti, shënon debutimin e Baron Cohen si regjisor dhe përfshin në kast aktoren Morgana Robinson. Ky personazh u shfaq për herë të parë në vitin 1998 dhe u bë i famshëm në fillim të viteve 2000. Baron Cohen e kishte paralajmëruar rikthimin e personazhit gjatë një paraqitjeje surprizë në Wimbledon në korrik të këtij viti, përpara se ta tërhiqte atë zyrtarisht nga ekrani në vitin 2007.