Në prag të shënimit të 30 Gushtit, Ditës Ndërkombëtare të Personave të Zhdukur, Rinia e Aleancës ka zhvilluar një aktivitet simbolik për të rikujtuar plagën e hapur të familjeve të personave të zhdukur në Kosovë. Përmes një mesazhi të vendosur publikisht, të rinjtë kanë shprehur kundërshtimin e tyre ndaj dërgimit të vagonëve të Kosovës për servis në Serbi, veprim ky që u konsiderua i papranueshëm nga ana e tyre.
Sipas përfaqësuesve të kësaj organizate, ky vendim është marrë pas sulmit terrorist në Banjskë, ndërkohë që familjet e personave të zhdukur vazhdojnë të kërkojnë të vërtetën dhe drejtësinë për të afërmit e tyre. Në mesazhin e tyre, të rinjtë theksuan se kujtesa nuk është vetëm një datë në kalendar, por një përgjegjësi e vazhdueshme institucionale.
Në thirrjen e tyre drejtuar ekzekutivit, ata kërkuan që Qeveria e Kosovës të japë përgjegjësi për këtë çështje, duke shtuar se familjet e të zhdukurve meritojnë sqarime konkrete dhe jo arsyetime. Aktiviteti u fokusua në rikujtimin e plagës ende të hapur të familjeve që jetojnë në pritje të fatit të më të dashurve të tyre, duke përcjellë mesazhin se "Kosova nuk harron".