Ambasadori i Kosovës në Shqipëri, Skënder Durmishi, së bashku me kryetarin e Bashkisë së Lezhës, Pjerin Ndreu, zhvilluan një vizitë në Spitalin Rajonal të Lezhës për t'u njohur nga afër me gjendjen shëndetësore të tre të rinjve nga Kosova, të cilët u përfshinë në ngjarjen tragjike në plazhin e Ranës së Hedhun në Shëngjin.
Sipas informacioneve nga stafi mjekësor, gjendja e tre të rinjve është e stabilizuar dhe ata vazhdojnë të mbahen nën monitorim të vazhdueshëm në urgjencën e spitalit. Ambasadori Durmishi falënderoi ekipet mjekësore dhe strukturat vendore për reagimin e shpejtë dhe ndihmën e ofruar.
Duke shprehur solidaritetin me familjet e të prekurve nga kjo ngjarje, ambasadori theksoi se institucionet janë duke punuar për të njoftuar familjarët e dy viktimave që humbën jetën në këtë tragjedi. Ai shtoi se po bëhet çdo gjë e mundur për mbështetjen e të mbijetuarve dhe sigurimin e trajtimit të nevojshëm mjekësor për ta.
Përditësime
Ambasadori Durmishi vizitoi të mbijetuarit e tragjedisë në Shëngjin në spital, duke konfirmuar se gjendja e tyre shëndetësore është e stabilizuar. Ai garantoi mbështetjen e plotë të Ambasadës për personat e prekur.