Ambasada e Shqipërisë në Kosovë i ka dhënë mirënjohje Spitalit të Përgjithshëm Rajonal të Prizrenit “Prim. Dr. Daut Mustafa” për kontributin në trajtimin e pacientëve nga Shqipëria, veçanërisht nga qarku i Kukësit dhe zonat veriore. Ceremonia u zhvillua të martën, në prani të ambasadorit Petrit Malaj, drejtorit të spitalit Osmani Hajdari dhe ministrin e Shëndetësisë në detyrë Arben Vitia.
Drejtori Osmani Hajdari deklaroi se gjatë vitit 2025 spitali trajtoi qindra pacientë nga Shqipëria, me rreth 800 hospitalizime, 400 ndërhyrje në urgjencë, 450 vizita në shërbime të tjera spitalore dhe mbi 2.200 seanca dialize, duke arritur në mbi 3.200 vizita specialistike.
Ambasadori Petrit Malaj vlerësoi profesionalizmin dhe përkushtimin e stafit mjekësor, duke e cilësuar shërbimin si dëshmi të solidaritetit dhe lidhjeve të forta mes dy vendeve. Ai theksoi se pacientët nga Shqipëria gjejnë shërbim cilësor dhe ngrohtësi vëllazërore në këtë institucion.
Ministri Arben Vitia nënvizoi se bashkëpunimi në shëndetësi midis Kosovës dhe Shqipërisë është prioritet, me fokus në shkëmbimin e përvojave dhe koordinimin institucional. Vizita u konsiderua si hap drejt forcimit të bashkëpunimit ndërkufitar në sektorin e shëndetësisë.