Një ngjarje e rëndë është regjistruar rreth orës 16:30, kur pesë të rinj kishin hyrë për t'u larë në det dhe u vunë në vështirësi për shkak të erërave të forta dhe dallgëve të larta. Pas njoftimit për ndihmë, në vendngjarje mbërritën shërbimet e Policisë Kufitare, forcat e Drejtorisë Vendore të Policisë Lezhë dhe ekipet e emergjencës.
Sipas njoftimit zyrtar të Policisë, nxjerrja nga uji e pesë personave u bë e mundur falë ndërhyrjes së shpejtë të qytetarëve me mjete lundruese tip Jet Ski, në bashkëpunim me forcat e rendit. Të pesë shtetasit u transportuan me urgjencë drejt Spitalit Rajonal të Lezhës. Pavarësisht përpjekjeve të mjekëve, dy prej të rinjve, Leonid Alia dhe Jetmir Çopa, humbën jetën, ndërsa tre të tjerët, të identifikuar si Dion Myftari, Arbër Beqaj dhe Drilon Rustemi, vijojnë të jenë nën kujdesin mjekësor.
Grupi hetimor, nën drejtimin e Prokurorisë, po punon për zbardhjen e plotë të rrethanave të kësaj ngjarjeje.
Përditësime
Tre të rinjtë që mbijetuan tragjedinë në Shëngjin ndodhen jashtë rrezikut për jetën, sipas burimeve mjekësore. Ambasadori i Kosovës në Shqipëri, Skënder Durmishi, ka vizituar të mbijetuarit në spital. Hetimet paraprake kanë konstatuar mungesën e kullave të vrojtimit dhe të flamujve sinjalizues të sigurisë në plazhin ku ndodhi ngjarja.