Aktori i njohur Vedat Bajrami ka ftuar qytetarët t'i bashkohen protestës së paralajmëruar për datën 1 tetor në Prishtinë. Përmes një postimi në rrjetet sociale, ai e ka cilësuar këtë tubim si një qëndrim qytetar përballë asaj që e konsideron si padrejtësi në lidhje me vendimin e Gjykatës Speciale në Hagë ndaj ish-krerëve të Ushtrisë Çlirimtare të Kosovës.
Protesta, e cila mbështetet edhe nga lëvizja Liria ka Emër, synon të shprehë përkrahjen për Hashim Thaçin, Kadri Veselin, Jakup Krasniqin dhe Rexhep Selimin. Sipas njoftimeve zyrtare, tubimi do të mbahet në sheshin Skënderbeu, duke filluar nga ora 16:00.
Në mesazhin e tij, Bajrami theksoi se pjesëmarrja në këtë protestë përfaqëson përcaktimin e popullit dhe të shtetit pas datës 16 shtator. Ai u bëri thirrje qytetarëve të bëhen bashkë për ata që sakrifikuan për lirinë dhe për drejtësinë, duke theksuar se ky nuk është thjesht një marshim, por një qëndrim përballë rrethanave aktuale.