Identifikimi i aflatoksinës M1 në qumështin e disa fermave në zonën e Lushnjës, disa ditë më parë, ka nxjerrë në pah çështjen e sigurisë ushqimore.
Kompanitë e mëdha të përpunimit të qumështit, së pari Lufra, ndaluan menjëherë grumbullimin dhe përpunimin e këtij qumështi, i cili konsiderohet i dëmshëm për shëndetin.
Në përgjigjen zyrtare drejtuar Shoqatës së Industrisë së Përpunimit të Qumështit, Autoriteti Kombëtar i Ushqimit (AKU) thekson se qumështi me përmbajtje aflatoksine M1 mbi kufirin e përcaktuar në legjislacionin e Bashkimit Europian, të zbatuar edhe në Shqipëri, është i pasigurt. Refuzimi i tij nga subjektet përpunuese përbën jo vetëm të drejtë, por edhe detyrim ligjor në funksion të mbrojtjes së shëndetit të konsumatorit.
Sipas nenit 10 të Ligjit Nr. 9863, datë 28.01.2008 "Për Ushqimin", i ndryshuar, ushqimi konsiderohet i pasigurt kur është i dëmshëm për shëndetin e njeriut dhe nuk lejohet të nxirret në treg apo të përdoret për përpunim. Neni 24 i të njëjtit ligj parashikon detyrimin e operatorëve të biznesit ushqimor për të refuzuar, bllokuar dhe njoftuar autoritetin kompetent në rast se konstaton mos përputhje me kërkesat e sigurisë ushqimore.
AKU vlerëson angazhimin e industrisë së përpunimit të qumështit për zbatimin e standardeve të sigurisë ushqimore. Përveç aflatoksinës, industria kryen kontrolle rigoroze për antibiotikët dhe nivelin e qelizave somatike, indikatorë kyç të cilësisë dhe sigurisë.
Fabrikat e mëdha si Lufra disponojnë sisteme digjitale për kontrollin e temperaturës dhe higjienës, laboratorë të brendshëm për analiza të përditshme, si dhe certifikime ndërkombëtare si ISO 22000.