Agjencia Kombëtare e Ujësjellës-Kanalizimeve (AKUK) ka ndërmarrë një aksion kontrolli në të gjithë territorin e vendit për të verifikuar përdorimin e ujit të pijshëm nga subjektet që ushtrojnë aktivitetin e lavazhit. Vendimi mbështetet në Kodin e Furnizimit me Ujë, i cili ndalon shfrytëzimin e rrjetit publik për këtë qëllim.
Sipas njoftimit zyrtar, subjektet që përdorin ujin e rrjetit publik për larjen e automjeteve duhet të ndërpresin këtë praktikë brenda datës 31 tetor. Pas këtij afati, autoritetet do të intensifikojnë kontrollet dhe do të zbatojnë masat administrative të parashikuara nga legjislacioni në fuqi.
Drejtori i Përgjithshëm i AKUK, Fludian Çuka, u ka bërë thirrje subjekteve që të marrin masa vullnetare për të shmangur sanksionet. Çuka theksoi se ndërhyrjet e paligjshme në rrjetin e ujësjellësit shkaktojnë humbje të ujit, rëndojnë presionin në rrjet dhe dëmtojnë furnizimin normal të qytetarëve.
Çdo lidhje e paligjshme e konstatuar do të dokumentohet nga ekipet e AKUK dhe do t'u referohet organeve kompetente për ndjekje penale. Agjencia rikonfirmon se rrjeti i ujit të pijshëm është pasuri e përbashkët dhe nuk do të tolerohet asnjë ndërhyrje e paligjshme.