Qendërmbrojtësi Albian Hajdari ka dhënë detaje rreth ndryshimit të përfaqësueses nga Zvicra te Kosova në një intervistë për mediumin zviceran “Watson”. Lojtari, i cili aktualisht është pjesë e klubit gjerman Hoffenheim, sqaroi se vendimi erdhi pas pakënaqësisë me minutazhin e ofruar nga përzgjedhësi Murat Yakin.
Sipas Hajdarit, zhgënjimi nisi gjatë grumbullimeve me Zvicrën, ku pas 180 minutave të mundshme në ndeshjet miqësore, ai u aktivizua vetëm për 45 minuta. Kjo situatë e bëri atë të kërkonte qartësi më të madhe mbi planet e Federatës Zvicerane të Futbollit. Pasi nuk u aktivizua në ndeshje zyrtare, Hajdari shfrytëzoi të drejtën ligjore për të ndryshuar përfaqësuese, duke iu bashkuar Kosovës vitin e kaluar.
Në lidhje me reagimet pas këtij kalimi, 23-vjeçari pranoi se ka përjetuar kërcënime, të cilat janë pasqyruar edhe në dokumentarin “The Belonging”. Ky projekt mediatik trajton sfidat e futbollistëve me pasaporta të dyfishta dhe dilemat e tyre në zgjedhjen midis shtetit ku janë rritur dhe vendit të prejardhjes së prindërve. Pavarësisht presionit, futbollisti theksoi se zgjedhja për të veshur fanellën e Kosovës mbetet e qëndrueshme.