Ushtruesja e detyrës së presidentes së Republikës së Kosovës, Albulena Haxhiu, priti në një takim përfaqësuesit e Komitetit Norvegjez të Helsinkit, sekretaren e përgjithshme Berit Nising Lindeman dhe zëvendëssekretarin e përgjithshëm Gunnar M. Ekelove-Slydal. Gjatë këtij takimi, Haxhiu nderoi këtë organizatë me Medaljen Presidenciale të Meritave.
Haxhiu vlerësoi punën e Komitetit si një ndër organizatat e para perëndimore që dokumentoi shkeljet e të drejtave të njeriut në Kosovë në një periudhë kur kjo çështje nuk ishte pjesë e vëmendjes ndërkombëtare. Ajo theksoi se angazhimi i kësaj organizate ndihmoi në ndërkombëtarizimin e këtyre shkeljeve dhe përfshirjen e Kosovës në agjendat e mekanizmave ndërkombëtarë për të drejtat e njeriut.
Përveç dokumentimit, Haxhiu vlerësoi mbështetjen e vazhdueshme të Komitetit për organizatat vendore, mediat dhe individët që mbronin të drejtat e njeriut. Ajo theksoi se Kosova nuk i harron ata që ofruan mbështetje në kohë të vështira.
Komiteti Norvegjez i Helsinkit, i themeluar në vitin 1977, është angazhuar në Kosovë që nga vitet '90, duke kontribuar në monitorimin e zgjedhjeve dhe raportimin e gjendjes në vend, bazuar në parimet e Aktit Final të Helsinkit të vitit 1975.