Në kuadër të shënimit të Ditës së Çlirimit të Kosovës, ushtruesja e detyrës së Presidentes, Albulena Haxhiu, ka nderuar me dekoratën “Urdhri i Lirisë” komandantin Adem Shehi.
Adem Shehi, me origjinë nga Farka e Tiranës, iu bashkua Ushtrisë Çlirimtare të Kosovës (UÇK) në një periudhë kur ushtria kishte nevojë për kuadro të përgatitura ushtarake. Ai solli përvojën e oficerit profesionist, duke ndihmuar drejtpërdrejt në organizimin dhe stërvitjen e qindra vullnetarëve dhe ushtarëve. Më pas, ai mori komandën e Brigadës 153 “Hyzri Talla” në Zonën Operative të Llapit, duke kontribuar në forcimin e njësive që vepruan në rajonet e Llapit dhe Gollakut.
Duke vlerësuar këtë kontribut, Albulena Haxhiu theksoi se si shumë oficerë e vullnetarë nga Shqipëria, Shehi e dinte se kur Kosova ishte në rrezik, kufiri nuk mund të ishte arsyetim për të qëndruar larg. Sipas saj, ky dekorim përfaqëson mirënjohjen për shërbimin, profesionalizmin dhe sakrificën e treguar në luftën për lirinë e vendit.