Ka ndërruar jetë Sahit Jashari, njëri ndër themeluesit dhe ushtarët e parë të Ushtrisë Çlirimtare të Kosovës (UÇK), me origjinë nga Prekazi i Skenderajt. Lajmin për ndarjen e tij nga jeta e ka bërë të ditur drejtori komunal i Skenderajt, Arbër Geci.
Përmes një reagimi publik, Geci ka vlerësuar lart kontributin e të ndjerit, duke e cilësuar atë si një nga bijtë më të devotshëm të vendit. Sipas Gecit, Sahit Jashari u rreshtua në shërbim të lirisë së atdheut që në ditët më të vështira, duke u shndërruar në simbol të guximit dhe përkushtimit.
"Sot Drenica, Kosova dhe historia e luftës sonë çlirimtare humbën një nga bijtë më të devotshëm të saj", ka shkruar Geci në njoftimin e tij, duke theksuar se trashëgimia e lënë pas nga Jashari do të mbetet gjithmonë në kujtesën e popullit.
Përditësime
Familja Jashari njoftoi se ka ndërruar jetë ish-komandanti i UÇK-së, Sahit Jashari, bashkëluftëtar i ngushtë i komandantit legjendar Adem Jashari. Gjatë Epopesë së UÇK-së, ai humbi 13 anëtarë të familjes së tij. Për shkak të veprimtarisë atdhetare, Sahit Jashari ishte përndjekur dhe dënuar nga regjimi i Millosheviçit. Ish-komandanti Sami Lushtaku ka shprehur ngushëllime, duke vlerësuar kontributin e tij për çlirimin e vendit.
Mijëra qytetarë dhe bashkëluftëtarë i dhanë lamtumirën e fundit ish-komandantit të UÇK-së, Sahit Jashari, në ceremoninë mortore të zhvilluar të premten në Prekaz. 61-vjeçari u përcoll për në banesën e fundit me nderime të larta ushtarake.