Ushtruesja e detyrës së presidentes, Albulena Haxhiu, është shprehur se nuk është në dijeni të thirrjeve të fundit për përfshirjen e Kosovës në projektin amerikan të gazit natyror. E pyetur nga mediat, Haxhiu deklaroi shkurtimisht: "Nuk e kam parë fare, më vjen keq, nuk e kam parë".
Kjo çështje është ngritur nga Ambasada e Shteteve të Bashkuara të Amerikës dhe Oda Ekonomike Amerikane në Kosovë, të cilat u kanë bërë thirrje institucioneve të ndërmarrin veprime urgjente. Sipas Odës Ekonomike, mungesa e konsideratës nga ana e Qeverisë në detyrë ndaj këtyre kërkesave është shqetësuese.
Në qëndrimet e institucioneve ekonomike theksohet se, përveç ndikimit në zhvillimin ekonomik, mosangazhimi në infrastrukturën e gazit të lëngshëm natyror (LNG) mund të reflektohet negativisht në marrëdhëniet strategjike me Shtetet e Bashkuara të Amerikës. Ndërkohë, vendet e tjera të rajonit tashmë janë zotuar për pjesëmarrje, duke e lënë Kosovën në rrezik të izolimit nga zhvillimet rajonale të energjisë.