Ushtruesja e detyrës së Presidentes së Republikës së Kosovës, Albulena Haxhiu, ka reaguar ndaj ngjarjes së rëndë të ndodhur në fshatin Kërvasari të Malishevës, ku një grua 25-vjeçare, e cila ishte në javën e 34-të të shtatzënisë, humbi jetën si pasojë e të shtënave me armë zjarri. Sipas informacioneve nga burimet, i dyshuari për këtë vrasje është bashkëshorti i viktimës, i cili po ashtu është plagosur dhe po trajtohet në gjendje të rëndë në Qendrën Klinike Universitare të Kosovës.
Përmes një deklarate publike, Albulena Haxhiu ka kërkuar nga organet e drejtësisë që ta hetojnë dhe ta zbardhin rastin në tërësi, duke theksuar se institucionet duhet të veprojnë pa vonesë. Ajo vlerësoi se siguria e shoqërisë është e ndërlidhur drejtpërdrejt me sigurinë e grave në ambientet e tyre shtëpiake.
Sipas Haxhiut, raste të tilla nuk mund të konsiderohen çështje private. Ajo theksoi se familja dhe martesa nuk duhet të përdoren si mburojë për të fshehur ose arsyetuar dhunën. Haxhiu ka shprehur tronditjen e saj për ngjarjen dhe i ka dërguar ngushëllime familjes së viktimës për humbjen e rëndë.