Ushtruesja e detyrës së Presidentes së Kosovës, Albulena Haxhiu, ka vizituar delegacionin e sportistëve kosovarë në Taranto të Italisë, në kuadër të pjesëmarrjes së tyre në Lojërat Mesdhetare 2026. Qëllimi i kësaj vizite ishte ofrimi i mbështetjes institucionale për ekipin olimpik, ku Haxhiu u takua nga afër me sportistët dhe drejtuesit e Komitetit Olimpik të Kosovës.
Fshati Mesdhetar për këtë edicion ka një organizim të veçantë, pasi sportistët janë akomoduar në dy anije të ankoruara në port, të quajtura Aroya dhe Romantika. Gjatë bashkëbisedimit, u.d. e Presidentes vlerësoi përkushtimin dhe krenarinë e pjesëmarrësve, duke theksuar se institucionet do të qëndrojnë pranë tyre në çdo paraqitje. Ajo shprehu urimin që puna e palodhur e sportistëve të shpërblehet me medalje, duke ndikuar në promovimin e vendit në arenën ndërkombëtare.
Gjatë kësaj vizite, Albulena Haxhiu ishte e shoqëruar nga një delegacion zyrtar, ku bënin pjesë ministri i Punëve të Brendshme, Blerim Gashani, ministri i Administrimit të Pushtetit Lokal, Elbert Krasniqi, si dhe ambasadorja e Kosovës në Itali, Nita Shala. Kosova përfaqësohet në këtë ngjarje sportive nga 163 sportistë.
Përditësime
Kryetari i Komunës së Prishtinës, Përparim Rama, iu bashkua delegacionit zyrtar në Taranto. Gjatë vizitës, përfaqësuesit e delegacionit zhvilluan një takim zyrtar me kapitenët e anijes Aroya, një prej objekteve lundruese që shërben si akomodim për sportistët pjesëmarrës në Lojërat Mesdhetare 2026.