Albulena Haxhiu, kryetare e Kuvendit njëherit u.d. presidentja e Republikës së Kosovës, vizitoi më 18 prill 2026 në Prishtinë kampin e kombëtares së Kosovës në konkurrencën e vajzave, në prag të ndeshjes me Bullgarinë.
Gjatë vizitës, ajo u prit nga presidenti i Federatës së Futbollit të Kosovës (FFK), Agim Ademi. Ai e falënderoi për mbështetjen ndaj futbollit të vajzave dhe theksoi se paraqitjet e deritashme të Dardaneve kanë qenë pozitive dhe burim krenarie për vendin.
Ademi deklaroi: «Vajzat tona me përkushtimin dhe rezultatet e tyre na kanë bërë krenarë të gjithëve. Uroj që me këtë formë të vazhdojnë edhe në ndeshjet e ardhshme».
Nga ana tjetër, Haxhiu përgëzoi futbollistet dhe stafin teknik për angazhimin dhe sukseset e arritura. Ajo nënvizoi ndikimin e tyre si shembull për shoqërinë dhe premtoi mbështetje të vazhdueshme.
Haxhiu u shpreh: «Ju, së bashku me trajnerin tuaj, jeni duke e lartësuar emrin e shtetit tonë. Jeni frymëzim për shumë vajza në Kosovë dhe përtej, pasi sukseset tuaja tashmë janë vërejtur edhe ndërkombëtarisht. Ju dëshiroj shumë fat dhe sukses në ndeshjen e sotme. Do të vazhdoj t’ju mbështes në vazhdimësi, sepse suksesi juaj është edhe sukses i shtetit».
Në emër të ekipit, kapitenia Erëleta Memeti falënderoi për vizitën dhe mbështetjen institucionale, duke e cilësuar atë si motivim shtesë.
Memeti tha: «E vlerësojmë shumë këtë vizitë. Për ne është motivim shtesë, pasi ne nuk e veshim këtë fanellë vetëm për veten, por për gjithë vendin dhe për të gjithë ata që na mbështesin në Kosovë dhe diasporë. Është nder për ne ta përfaqësojmë Kosovën në arenën ndërkombëtare dhe do të vazhdojmë të japim më të mirën tonë».
Ndeshja kundër Bullgarisë pritet të jetë test i rëndësishëm për vazhdimësinë e rezultateve pozitive të kombëtares.