Kryetari i Bashkimit Demokratik për Integrim (BDI), Ali Ahmeti, ka adresuar një mesazh me rastin e festës së 2 Gushtit, duke theksuar se idealet e Manifestit të Krushevës për barazi dhe bashkëjetesë po ndeshen me sfida të mëdha. Sipas Ahmetit, vendi po shmanget nga parimet e partneritetit, duke i hapur rrugë logjikës së dominimit në vend të gjithëpërfshirjes.
Sipas vlerësimeve të kreut të BDI-së, Marrëveshja Paqësore e Ohrit, e konsideruar prej tij si vazhdimësia bashkëkohore e frymës së Manifestit të Krushevës, po përballet me përpjekje të vazhdueshme për dobësim. Ahmeti ka renditur disa çështje shqetësuese për drejtimin e vendit:
• Sulmet ndaj përdorimit zyrtar të gjuhës shqipe.
• Anulimi i mekanizmave që garantonin përfaqësim të drejtë dhe adekuat.
• Dobësimi i mekanizmit mbrojtës nga majorizimi.
• Mosrespektimi i realitetit të regjistrimit të popullsisë.
• Promovimi i një koncepti monoetnik të shtetit dhe drejtësia selektive.
Ahmeti ka deklaruar se shqiptarët po margjinalizohen në një sërë sektorësh, përfshirë administratën, diplomacinë, sigurinë, drejtësinë, arsimin, kulturën, shëndetësinë dhe ekonominë. Një kritikë e veçantë iu drejtua edhe atyre përfaqësuesve shqiptarë në pushtet, të cilët sipas tij kanë zgjedhur nënshtrimin përballë pushtetit, në vend të mbrojtjes së interesit kombëtar dhe dinjitetit të qytetarëve.
Megjithatë, kreu i BDI-së nënvizoi se orientimi i shqiptarëve mbetet i palëkundur drejt një Maqedonie të Veriut unitare, demokratike dhe evropiane, të integruar në NATO dhe Bashkimin Evropian. Ai bëri thirrje që vendi të trajtohet si atdhe i përbashkët, ku barazia dhe respekti i ndërsjellë të jenë themelet e stabilitetit dhe së ardhmes së shtetit.