Altin Krasniqi, djali i ish-komandantit të UÇK-së, Jakup Krasniqi, reagoi në Facebook kundër kërkesës së Prokurorisë në Hagë për dënim me 45 vjet burg për secilin nga ish-krerët e Ushtrisë Çlirimtare të Kosovës.
Në postimin e tij, Krasniqi shkroi se Prokuroria do ta kishte më të lehtë dhe më të sinqertë të deklaronte hapur se shqiptarët duhej të rrinin duarkryq, të pranonin vrasjen, përdhunimin, nënçmimin dhe trajtimin çnjerëzor, në vend që të luftonin për mbijetesë dhe dinjitet.
Ai theksoi se në këtë narrativë problemi nuk janë krimet sistematike të Serbisë, por guximi i popullit shqiptar për t'u mos dorëzuar para shfarosjes. Sipas tij, viktima relativizohet, ndërsa rezistenca kriminalizohet.
Krasniqi vuri në dukje se historia nuk shkruhet nga ata që u përkulën, por nga ata që refuzuan nënshtrimin. "Një pjesë e vogël e popullit shqiptar zgjodhi rezistencën si akt të fundit mbijetese, jo si zgjedhje politike, por si domosdoshmëri njerëzore. Sot, vetë ekzistenca jonë është dëshmia më e fuqishme se ajo luftë ishte e drejtë, e pashmangshme dhe legjitime", shkroi ai.
Reagimi i Krasniqit vjen në kohën kur gjykimi ndaj ish-udhëheqësve të UÇK-së vazhdon në Hagë, ndërsa seanca për deklaratat përmbyllëse është planifikuar të zgjasë deri më 18 shkurt.
Përditësime
Altin Krasniqi reagoi ndaj kërkesës së Prokurorisë në Hagë për 45 vjet burg, duke deklaruar: "Çdo përpjekje për ta kriminalizuar këtë rezistencë nuk përfaqëson drejtësi, por një akt politik të rrezikshëm që synon rishkrimin e historisë, barazimin e agresorit me viktimën dhe ndëshkimin e së drejtës për liri."