Ambasada e Shteteve të Bashkuara në Tiranë mbështeti pjesëmarrjen e gjyqtarëve, prokurorëve, hetuesve dhe policisë gjyqësore shqiptare në një trajnim të udhëhequr nga FBI-ja mbi krimin kibernetik dhe hetimet e shfrytëzimit të fëmijëve.
Trajnimi u zhvillua në Akademinë Ndërkombëtare të Zbatimit të Ligjit të Shteteve të Bashkuara në Budapest, ku zyrtarët shqiptarë u bashkuan me ekspertë nga vende të ndryshme evropiane.
Diskutimet u përqendruan në përhapjen e materialeve të shfrytëzimit të fëmijëve në internet, shpërndarjen e përmbajtjeve të dëmshme, identifikimin e zhvillimeve të reja në ndjekjen kibernetike, njohjen e viktimave dhe hetimin e shkeljeve të tjera kibernetike.
Këto aftësi do të ndihmojnë ekspertët e zbatimit të ligjit dhe gjyqësorin shqiptar për të identifikuar, hetuar dhe ndjekur penalisht personat që përdorin internetin për të dëmtuar fëmijët.
Ambasada thekson: "Nuk ka përgjegjësi më të madhe sesa t’i mbajmë fëmijët tanë të sigurt. Megjithatë, sot më shumë se kurrë fëmijët janë të ekspozuar ndaj shfrytëzimit dhe kërcënimeve kibernetike në internet." Ajo shprehet krenare për mbështetjen e dhënë.