Ambasada e Shteteve të Bashkuara në Shqipëri publikoi një njoftim për qytetarët amerikanë në lidhje me protestën e paralajmëruar nga opozita, që pritet të zhvillohet mbrëmjen e së premtes, 8 maj, në Tiranë.
Tubimi është planifikuar të nisë në orën 19:00 në Bulevardin Dëshmorët e Kombit, në segmentin midis Sheshit Skënderbej dhe Sheshit Nënë Tereza, pranë godinës së Kryeministrisë. Ambasada bën të ditur se protesta mund të shtrihet në zona të tjera përreth.
Në njoftim paralajmërohet për prani të shtuar të forcave policore, bllokime të mundshme rrugësh dhe ndërprerje të qarkullimit para dhe gjatë zhvillimit. Personeli i ambasadës është udhëzuar të shmangë zonën e protestës.
Qytetarëve amerikanë u rekomandohet:
- Të mos marrin pjesë në aktivitet;
- Të tregojnë kujdes të shtuar gjatë lëvizjes në kryeqytet;
- Të jenë të vetëdijshëm për ambientin përreth;
- Të ndjekin mediat lokale për informacion të përditësuar;
- Të kenë një plan emergjence ose rrugë alternative largimi;
- Të mbajnë profil të ulët në publik.
"Edhe pse protestat dhe grumbullimet e mëdha shpesh nisin në mënyrë paqësore, situata mund të ndryshojë shpejt", thuhet në njoftimin e ambasadës.
Kryedemokrati Sali Berisha ka deklaruar se protesta do të jetë paqësore.
Përditësime
Policia e Shtetit njofton bllokime rrugore për protestën e opozitës në Tiranë:
- Nga 23:45 e enjtes në Bulevardin Dëshmorët e Kombit (nga Ura e Dajtit deri në Rr. Ismail Qemali).
- Nga 15:00 të 8 majit në segmente të tjera: kryqëzimin pranë Ministrisë së Brendshme deri në Sheshin Nënë Tereza, rrugët Ukraina e Lirë, Papa Gjon Pali II dhe Ismail Qemali.
Drejtori i Përgjithshëm i Policisë, Skënder Hita, deklaroi se protesta është autorizuar vetëm në bulevard. Policia do të veprojë sipas ligjit jashtë perimetrit dhe ka marrë masa për zhvillim paqësor, si në protestën e fundit.