Pas përshkallëzimit të tensioneve në Lindjen e Mesme dhe nisjes së konfliktit mes Iranit, Izraelit dhe SHBA-së, Ambasada e Shteteve të Bashkuara në Tiranë ka reaguar për Euronews Albania në lidhje me rreziqet e mundshme të sigurisë për Shqipërinë. Reagimi erdhi në kontekstin e pranisë në vend të anëtarëve të organizatës opozitare iraniane MEK.
Në përgjigjen e dhënë gazetarit Thimi Samarxhiu, ambasada theksoi se SHBA dhe Shqipëria diskutojnë dhe koordinohen rregullisht për shqetësimet e përbashkëta të sigurisë. “Si aleatë në NATO, Shtetet e Bashkuara dhe Shqipëria diskutojnë dhe koordinohen rregullisht për shqetësimet e përbashkëta të sigurisë. Ne mbetemi vigjilentë për të garantuar sigurinë e qytetarëve amerikanë dhe shqiptarë njëkohësisht”, thuhet në deklaratë.
Euronews Albania pyeti nëse Shqipëria përballet me rrezik të shtuar nga Irani për shkak të MEK-ut, nëse ka paralajmërime të reja për kërcënime dhe nëse zhvillohen konsultime të vazhdueshme mes Uashingtonit dhe autoriteteve shqiptare. Përgjigja e ambasadës nuk konfirmon kërcënim specifik, por nënvizon koordinimin e vazhdueshëm midis aleatëve NATO, veçanërisht në kohë tensionesh gjeopolitike globale.
Shqipëria strehon prej vitesh mijëra anëtarë të MEK-ut, çka ka shkaktuar përplasje diplomatike me Teheranin. Në vitin 2022, Tirana ndërpreu marrëdhëniet diplomatike me Iranin pas një sulmi kibernetik të madh ndaj institucioneve shtetërore, për të cilin autoritetet shqiptare dhe partnerët ndërkombëtarë fajësuan aktorë të lidhur me shtetin iranian.