Ministria për Evropën dhe Punët e Jashtme ka reaguar zyrtarisht ndaj sulmit iranian që shënjestroi Ambasadën e Shteteve të Bashkuara të Amerikës në Riad të Arabisë Saudite më 4 mars 2026.
Në deklaratën e saj, ministria thekson se Shqipëria dënon me forcë sulmin iranian. "Akte të tilla janë të papranueshme dhe përbëjnë një shkelje të qartë të së drejtës ndërkombëtare dhe të parimeve themelore që mbrojnë misionet diplomatike dhe personelin e tyre në mbarë botën", thuhet më tej.
Sulme të tilla rrezikojnë jetë njerëzish, rrisin tensionet dhe shtojnë rrezikun e destabilizimit të mëtejshëm si dhe të përshkallëzimit të pakontrolluar në një rajon të brishtë. Ministria nënvizon se Shqipëria qëndron në solidaritet të plotë me Shtetet e Bashkuara të Amerikës dhe rikonfirmon mbështetjen e palëkundur për sigurinë e aleatëve dhe mbrojtjen e personelit diplomatik.
"Siguria e partnerëve tanë dhe ruajtja e stabilitetit rajonal janë të panegociueshme", përfundon deklarata, e publikuar në platformën X nga llogaria zyrtare @AlbanianDiplo në shqip dhe anglisht.