Ambasada e Shqipërisë në Katar ka njoftuar qytetarët shqiptarë të qëndrojnë brenda banesave dhe rezidencave të tyre, në rast shpërthimesh të mëtejshme. Kjo vjen për shkak të situatës së sigurisë rajonale, e monitoruar në koordinim me Ministrinë për Evropën dhe Punët e Jashtme, autoritetet e Katarit dhe përfaqësitë diplomatike në Dohë.
Ermal Kaleci, i Ngarkuari me Punë në Ambasadën e Shqipërisë në Dohë, ka publikuar njoftimin në rrjetet sociale. Ai shpjegon se kushtet e sigurisë nuk favorizojnë rifillimin e aktiviteteve normale të përditshme. Qytetarët këshillohen të shmangin lëvizjet e panevojshme, të marrin masa paraprake dhe të ndjekin udhëzimet e autoriteteve lokale.
Ambasada bën thirrje për qetësi, kujdes të shtuar, vigjilencë dhe durim deri në tejkalimin e situatës. Hapësira ajrore e Katarit vijon të jetë e mbyllur deri në njoftim të dytë. Për të shmangur informacionet e pasakta, rekomandohet ndjekja e mediave të besueshme vendase dhe ndërkombëtare, si dhe zbatimi me përpikëri i udhëzimeve lokale në kohë reale përmes aparateve celularë.
Ambasada do të mbajë kontakt të vazhdueshëm me qytetarët përmes emailit, kanaleve të mediave sociale në Facebook, X dhe Instagram, si dhe grupit në WhatsApp "Komuniteti Shqiptar Doha". Në raste emergjence, linjat telefonike janë të disponueshme 24/7 në numrat +974 77180778 dhe +974 30079922.
Përditësime
Autoritetet katariase raportojnë rreth 200 shtetas shqiptarë në Katar.
Janë regjistruar katër valë sulmesh, por situata mbetet nën kontroll pa panik.
Autoritetet vendase kanë urdhëruar punë nga distanca për 3 ditë.
Nuk ka alarm për evakuim të menjëhershëm.
Ambasada shqiptare ka krijuar një databazë për regjistrimin e kthimit dhe pret rifillimin e fluturimeve.
Një familje turistike shqiptare është në siguri dhe e akomoduar.