Ambasada e Republikës së Kosovës në Doha ka njoftuar qytetarët kosovarë se autoritetet e Shtetit të Katarit mbulojnë shpenzimet e akomodimit në hotel për turistët e bllokuar në vend për shkak të rrethanave aktuale dhe kufizimeve të përkohshme të udhëtimit.
Ky vendim hyn në fuqi nga 28 shkurt dhe mbetet në fuqi deri në rifillimin e operacioneve në aeroport dhe rihapjen e hapësirës ajrore. Masa zbatohet edhe për qytetarët e Kosovës që nuk mund të largohen përkohësisht nga Katari.
Ambasada rekomandon që qytetarët të qëndrojnë të qetë, të ndjekin me përpikëri udhëzimet e autoriteteve katariane dhe të shmangin lëvizjet e panevojshme. Ajo do të vazhdojë të ndjekë nga afër zhvillimet dhe të mbajë qytetarët të njoftuar për çdo informacion shtesë.
Njoftimi është shpërndarë nga Ministria e Punëve të Jashtme dhe Diasporës e Kosovës përmes postimeve në rrjetet sociale dhe media.