Ambasada e Kosovës në Abu Dhabi ka njoftuar qytetarët kosovarë në Emiratet e Bashkuara Arabe për mundësinë e evakuimit emergjent në rast vazhdimi të bllokadës së hapësirës ajrore.
Në njoftimin zyrtar, ambasada bën të ditur se është në komunikim të vazhdueshëm me autoritetet e Emirateve të Bashkuara Arabe, institucionet shtetërore në Kosovë dhe Ambasadën e Kosovës në Riad, për të shqyrtuar opsionet më të shpejta dhe më të sigurta për evakuimin e qytetarëve, përfshirë vizitorët e bllokuar dhe rezidentët.
Ambasada u bën thirrje qytetarëve që nuk janë paraqitur ende të kontaktojnë menjëherë përmes emailit embassy.uae@rks-gov.net ose kosembuae@gmail.com dhe numrit të telefonit/WhatsApp +971 54 709 2109. Ata duhet të dërgojnë të dhënat personale sipas dokumentit të udhëtimit, qytetin ku ndodhen dhe adresën e qëndrimit.
Regjistrimi është i domosdoshëm për procedimin e kërkesave në rast evakuimi, duke përfshirë pajisjen me leje kalimi urgjente në kufirin e Mbretërisë së Arabisë Saudite. Procedura realizohet nga Ambasada në Abu Dhabi në koordinim me atë në Riad.
Në rast nevojese për evakuim të organizuar emergjent, ambasada do të njoftojë qytetarët për fluturime nga aeroportet e Jeddah-ut ose Riyadh-ut, në koordinim me autoritetet e Emirateve, institucionet kosovare dhe ato saudite.