Ambasada e Republikës së Kosovës në Riad ka njoftuar se Ministria e Punëve të Jashtme e Arabisë Saudite ka vendosur një masë të re për lehtësimin e hyrjes së shtetasve të huaj në territorin e Mbretërisë.
Kjo masë synon largimin e tyre drejt vendeve të origjinës përmes tranziti saudit. Autoritetet saudite kërkojnë nga shtetet përkatëse dorëzimin e listave me emrat e qytetarëve, të dhënat e pasaportave dhe destinacionet e udhëtimit, duke përfshirë vendin nga vijnë udhëtarët:
- Kuvajti;
- Bahreini;
- Katari;
- Emiratet e Bashkuara Arabe;
- Omani.
Procedura mundëson pajisjen me viza saudite për hyrje emergjente dhe përshpejtimin e kthimit. Ky vendim lidhet me situatën në Lindjen e Mesme, që ka rritur pasigurinë për lëvizjen e qytetarëve.
Ambasada i fton shtetasit kosovarë në këto vende që kanë nevojë për asistencë të dërgojnë të dhënat në adresën embassy.saudiarabia@rks-gov.net.