Ambasada e Republikës së Kosovës në Emiratet e Bashkuara Arabe ka lëshuar një njoftim zyrtar, duke u kërkuar shtetasve kosovarë, vizitorë ose rezidentë, të respektojnë rregullat lokale pas sulmeve të Iranit ndaj këtij shteti.
Në njoftim specifikohet se ndalohet rreptësisht fotografimi, incizimi apo shpërndarja e pamjeve dhe informacioneve nga vendet ku ndodhin incidente të lidhura me raketa apo dronë.
Ndalohet gjithashtu publikimi i vendndodhjeve të këtyre incidenteve në rrjete sociale apo platforma të tjera.
Autoritetet e Emirateve të Bashkuara Arabe zbatojnë masa të rrepta ligjore ndaj shkeljeve, duke përfshirë:
- gjoba të larta financiare;
- dënime me burg;
- konfiskim të pajisjeve elektronike;
- deportim të shoqëruar me ndalim të rikthimit në vend.
Ambasada thekson nevojën për respektim me përpikëri të ligjeve dhe rregullave në fuqi, si dhe kontribut në ruajtjen e sigurisë dhe rendit publik nga qytetarët kosovarë.